سدارامیا کا شدید حملہ: مودی نے امریکہ کے سامنے سر جھکا دیا، تجارتی معاہدہ کسانوں کے لیے خطرہ**

 سدارامیا کا شدید حملہ: مودی نے امریکہ کے سامنے سر جھکا دیا، تجارتی معاہدہ کسانوں کے لیے خطرہ

کرناٹک کے وزیر اعلیٰ سدارامیا نے ہندوستان اور امریکہ کے درمیان عبوری تجارتی معاہدے کو ملک کے مفادات کے خلاف قرار دیتے ہوئے وزیر اعظم نریندر مودی پر سخت تنقید کی ہے۔ انہوں نے الزام لگایا کہ مودی حکومت نے امریکہ کے دباؤ میں آکر یکطرفہ فیصلے کیے ہیں، جس سے ملک کی خودمختاری اور عزت کو نقصان پہنچا ہے۔

سدارامیا نے کہا کہ امریکہ کی جانب سے بھارتی اشیاء پر ٹیرف کم کرنے کو بڑی کامیابی کے طور پر پیش کیا جا رہا ہے، جبکہ حقیقت میں بھارت نے امریکی مصنوعات پر محصولات صفر کر دیے ہیں۔ انہوں نے اسے 140 کروڑ ہندوستانیوں، خاص طور پر 72 کروڑ کسانوں کے ساتھ بڑا دھوکہ قرار دیا۔

انہوں نے روس سے تیل کی خریداری میں کمی اور امریکہ و وینزویلا سے تیل خریدنے کے فیصلے پر بھی تشویش ظاہر کی، اور کہا کہ اس کے نتیجے میں پیٹرول، ڈیزل اور دیگر ضروری اشیاء کی قیمتوں میں اضافہ ہوگا۔ سدارامیا کے مطابق اس معاہدے سے امریکی کسانوں کو فائدہ اور بھارتی کسانوں کو نقصان ہوگا، کیونکہ سستی امریکی زرعی مصنوعات سے ملکی منڈیاں بھر جائیں گی۔

وزیر اعلیٰ نے کہا کہ یہ معاہدہ قومی مفادات کا تحفظ نہیں کرتا اور عالمی سطح پر ہندوستان کی پوزیشن کمزور ہوئی ہے۔ انہوں نے وزیر اعظم نریندر مودی سے مطالبہ کیا کہ وہ ناکام پالیسیوں کی ذمہ داری قبول کرتے ہوئے استعفیٰ دیں۔